Silaban Brotherhood: Media Informasi dan Komunikasi Generasi Silaban di Internet

Pilih Topik Artikel:

Selasa
9
Okt '07

Ende Siboru Tombaga IV


Ceritera Legenda ini merupakan sambungan dari bagian sebelumnya :
- Ende Siboru Tombaga I
- Ende Siboru Tombaga II
- Ende Siboru Tombaga III
Silahkan memberikan apresiasi dengan memberikan komentar. Parhobas [SB]

29
Ringgit ni dahahang i,
Ingkon lehon saonari.
Molo so dilehon ho i.
Jabuon surbuon tu api.

Tutu do ndang diboto,
Siboru Tombaga ingananna.
Ai anggina si Buntulan do,
Na manabunihonsa.

Hau sian jolo sopo,
Dibahen tu pudi ruma.
Dibahen na so huboto,
Horas do au marsumpa.

Ndang adong huboto,
Ndang huida ingananna,
Sombangku da amang
Unang ho marlaga-laga.

Topik-topik ni pinggan,
Binahen tu para-para,
Dung so tarida ringgit i.
Tu beangan si Tombaga.

Ro ma pasi gadong,
Sian porlak sibun-buni.
Boru Buntulan,
Laho dainang martabuni.

Molo diida ho anon.
Dohot muse ho dirahuti;
Asa pahatop ma mardalan,
Lao ma ne ho martabuni.

Laho si buntulan,
Humatop maringkati,
Unang sanga diida,
Asa sanga martabuni.

30
Pat ni si Tombaga tu beangan,
Tangan na i dibobok tali,
Rohana so marhasonangan,
Luhutna di pasari-sari.

Habang ma ambaroba,
Mangangkat di atas batu,
Oh amang Silitonga,
Tanggal beangan sian pat hu.

Ia so ditanggal ho,
Ingkon hona sapatanghu,
Ai so adong huboto.
Tu ho hasalaanku.

Sinamot ni hahami,
Ndang haoraan au;
Pahumpuonmu sian toru,
Papungu dohot sian jabu.

Na so huboto i,
Unang i pausoi tu ahu,
Oh amang Silitonga,
Tanggal beangan sian pat hu,

Tangis Siboru Tombaga,
Mangandung ibana manungki,
Amana Silitonga,
Suda sinamot di tarui.

Tu beangan si Tombaga,
Si Buntulan pe martabuni.
Mangangguhi si Tombaga,
So adong na mangalusi.

Mata Ompu Gulasa,
Boruna di pukpuhi,
Sai dibagasan mara,
Nang pe laho martabuni.

31
Sian aek dalan ni solu,
Sian tur dalan ni hoda,
Mangandung si Tombaga,
Paboahon hi namagona.

Diparmate ni amana,
Na so ada ibotona,
Sinamot ni amana,
Dibuat amana Silitonga,

Marsiak bagi si Tombaga,
Ndang adong nahinongkopna,
Hinamago ni si Tombaga,
Na so ada tudosanna.

Si dua satutuha,
Aik anak ma i nian sada
Ndang songoni dangolna,
Dipambahen ni udana.

Sai gumogo ma baoa,
Mamboanhon i tu raja,
Umbahen uhum roha-roha,
Pambahenan ni udana.

Adat nahurang ture,
Dijolma si birong mata,
Holan anak do panean,
Di sinamot ni amana.

Anggo boru so rajumon
Marduahon pinungkana,
Umbahen so boi raja,
Mangampini si Tombaga.

Soluk ma amangudana,
Maringanan di jabuna,
Marsapata si Tombaga,
Tu amana Silitonga.

32
Na so siol i di boru.
Sahat ro di pinomparna.
Luhut do hita jolma,
Mamursikhon ibana.

Na so uhum na so paho,
Binahenna tu si Tombaga,
Ala so tarida ringgit,
Tu beangan si Tombaga.

Dung tar barita i,
Tu pinggol ni angka Raja.
Marlojongi ma nasida,
Paluahon si Tombaga

Dung suda sinamot i,
Dibuat amana Silitonga.
Dipalaho si Tombaga,
Manang tudia topotonna.

Songon lampak ni pinang,
Longkang dung mahiang,
Siboru Tombaga i,
Laho tu harangan na bidang.

Mandapothon si Buntulan,
Na monggop di liang-liang,
Disi ma nasida na dua,
Tangis martutungkian.

So tampil be tu huta,
Liang nama ingannanna.
Dipingkir hinamagona,
Na so ada tudosanna.

Si Tombaga sihahaan,
Si Buntulon Sianggian,
Hinamabo ni nasida,
Lompo do turi-turian.

33
Dihatahon na jumolo,
Ditorsahon na dipudian.
Diaonlaon ni ari,
Songon turi-turian.

Adong ma sada halak,
Isi ni luat parbotihan.
Laho marburu hije,
Tu harangan na bidang.

Toho dapot langkana,
Jolma di liangliang,
Di rimpu begu so jolma,
Bodil di tangan hambirang.

Naeng ma bodilhononna.
Dompak jolma na diliang,
Hape pintor marsuara,
Angguk na marsirainan.

Jadi roma baoa i,
Na sian Parbotihan,
Dipatangkas ma diida,
Dua boru masiabingan.

Dipajonok ma diida,
Asa tangkas masisiean,
Pajumpang ma nasida,
Dapot ma sipangkulingan.

Mangkuling ma baoa i,
Na sian Parbotihan,
Boan na ginjang na bolon,
Goarna Aman Tornaginjang.

Na tinitip sanggar,
Bahen huruhuruan,
Jolo siningkun marga,
Asa binoto partuturan.

34
Inang boru-boru,
Dia marga ni dainang,
Tama do na manise,
Lehet masisungkunan.

Na mangkuling imbo,
Sian atas ni sidulang,
Atik beha na mariboto,
Manang marboru ni tulang.

Na marluga solu,
Marluga marsiadu;
Amang doli-doli,
Ndada huboto margakku.

Tu jolo tu pudi,
Songon pardalan ni horbo,
Dainang so na hutanda,
Damang pe so na huboto.

Unang longang ho amang,
Ndatung ahu na mamorso,
Ba, laos timbang roham,
Hami pe mian dison do.

Pusuk niramba poso,
Sipusuk ni arsam natata,
Tanda ni na so mamorso,
Horas do ahu nang marsumpa.

Ia molo songon i,
Boru ni Raja nami,
Songon hodong songon pahou,
Songon i do ho, songon i ahu.

Margam pe so diboto ho,
Ahu pe ndang huboto margakku;
Dia ma dohononku tu ho,
Pariban nama di rohangku.

35
Ro ahu tu Toba on,
Sian jau harorongku,
Sian ladang do ahu ro,
Jabu pe so ada ingananku.

Songon i ma i didok,
Paserephon rohana;
Laho mambuat roha,
Ni Siboru Tombaga.

Na marluga solu,
Solu marsada-sada;
Pajumpang hita inonge,
Ba beha pangalohana ?

Sada dua tolu,
Songon nidok ni pamilangi,
Boru ni Raja nami,
Donganku ho marpadi-padi.

Hinorhon ni sitaonon,
Pajumpang hita be;
Asi roha ni Tuhan,
Anggiat ma hita gabe.

Olo tubuan laklak,
Jala tubuan singkoru,
Olo tubuan anak,
Jala tubuan boru.

Olo tubuan laklak,
Di dolok ni Purbatua;
Olo tubuan anak,
Dongan sarimatua.

Poltak ma bulan i,
Dohot bintang sihapu-hapu;
Ndang boi ahu di ho,
Ai so ada panggulmitangku.

36
Damang pe so hutanda,
So na huboto margakku;
Ahu pe boru ni Toba,
Ba hamu pe anak ni jau.

Hita on na mian di ladang,
Ndada na domu di jabu;
Beha ma partupana.
Hita marjabu-jabu.

Ianggo siala i,
Ndada tu hata bahenonku,
Asa tung hot hata i,
Gana dia tolononku.

Ima sidohononku,
Hata siingotonmu.
Paboa na so oseonku,
Padan sibahenonmu.

Nungga balintang pagabe,
Tumandanghon sitadoan,
Nungga arinta gabe,
Molo masipaoloan.

Topik-topik ni pinggan,
Binahen tu para-para,
Molo domu hita doli,
Ba, ise sipadomu hata.

Nungga tonggi tabo,
Songon dai ni pora-pora.
Boru ni Raja nami,
Ba, ise ma sijuonta.

Inanta pe soada,
Sae pambahenan ni rohanta,
Dua do hita di son,
Jala patolu anggitta.

37
Tombak do ingananta on,
Ndang adong jolma ni ida,
Domu pe hita dison,
Holan panjou ni tonditta.

Hudapot pe hamu dison,
Ndada jolo huida,
Tung i ma partupana,
Pandokkon ni parsorionta.

Dung songon i be hata i,
Marpadan ma nasida,
Marhata sigabe-gabe,
Masiommaan ma nasida.

Topik-topik ni pinggan,
Binahen tu para-para,
Taringot tu si Tombaga,
Songon i ma pardalananna.

Halak Siboru Tombaga,
Sahat tu huta ma nasida,
Ia dung sahat tu huta,
Digondangi do nasida.

Aman Tornaginjang,
Harajaan ni si Tombaga,
Anggi ni Aman Tornaginjang,
Ima Aman Dolok Maria.

Si Buntulan angina,
Gabe di Aman Dolok Maria,
Songon i ma didok barita i,
Gabe mamora do nasida.

Ai boi do dialap,
Ringgit mas na tinanomna,
Jolo margelleng do nasida,
Asa dibuat sibunianna.

38
Laos dipatorang-torang,
Diparmate ni amana,
Dohot na hansit ditaon,
Di pambahen ni udana.

Ditumpak Debata,
Maulibulung do nasida,
Gabe tubuan anak,
Angkupna sarimatua.

Ujung ni si Tombaga,
Songon i ma pardalananna,
Ndatung na huida,
Ahu pe na umbege hata.

Marende na jumolo,
Songon i ma pardalanna,
Hurang lobi sian i,
Ndang huboto baritana.

Dia ma poda sian i;
Di angka Tuan-tuan panjaha,
Ganup ma marpinkir,
Na tumbuk tu rohana.

Na dapot hupingkir,
Ima na hupaboa,
Dijaha tuan pamasa,
Songon na tarsurat di toru on ma:

Na todos do hape,
Halak Siboru Tombaga,
Mangulahon binoto na,
Nang pasangaphon amana.

Ndang adong dihabiari,
Manang dia pe marana,
Naung lompo do dipingkir,
Pambahen ni amanguda na

39
Olat ni na masa i,
Marpingkir ma angka raja,
Di langka ni siteanon,
Dohot ma boru nampunasa.

Marguna ma hape.
Partinaonan ni si Tombaga,
Gabe mambahen turgas,
Tu angka raja-raja.

Sai adong hata ingoton,
Barita ni si Tombaga,
Na lompo do turi-turian,
Di jolma sibirong mata.

Songon i ma na huboto,
Hamu tuan-tuan panjaha,
Ditumpak Debata ma
Sai horas hita sudena.

Horas !

Edisi sebelumnya :
- Ende Siboru Tombaga I
- Ende Siboru Tombaga II
- Ende Siboru Tombaga III


Ada 3 tanggapan untuk artikel “Ende Siboru Tombaga IV”

  1. Tanggapan Pahala Panjaitan:

    happy ending and good luck

  2. Tanggapan Anthoni Sinaga:

    salut sama yg menyusun kata-kata ende siboru tumbaga ini.luar biasa…dan saya baru menemukan jati diri org batak yg sebenarnya….dgn ende siboru tumbaga….maju terus bangso batak……

  3. Tanggapan Otto Sihombing:

    karena waktuku sngkat membaca tapi saya tetap terharu membacanya. adapun kesimpulan dan pertanyaan sbb :
    1. Kejadian turi2an ini tahun berapa?
    2. Kawinnya si TUmbaga sama Marga apa dan di Kampungmana?
    3. Situmbaga ini berarti Br. Silitonga. Tapi sekarang ini Marga silitonga tidak seperti cerita ini lagikan?
    4. Suaminya Situmbaga marga apa? dan kediamannya dimana
    5. Kalau ada pemikiran baru lagi bisakan ditanya lagi. Tks

Silahkan memberikan tanggapan !

Catatan:
1) Mohon Maaf.. Tanggapan perdana Anda akan kami moderasi sebelum ditampilkan !
2) Selanjutnya dikemudian hari, mohon gunakan Data Anda (Nama, Email, Website) dengan konsisten (sama) agar tanggapan Anda langsung tampil (tanpa moderasi) dan memudahkan Anda menelusuri komentar-komentar sebelumnya pada situs ini.





Artikel sebelumnya :
   » » Ende Siboru Tombaga III
Artikel selanjutnya :
   » » Petani Mandiangin Dibacok